NE Zone ah Manipur an thiam ber

06^th September, 2017

Northeast Zone Interstate Badminton Championship, 2017 khelh mek ah Senior Mixed Team in elnaah Manipur Team chuan Mizoram Team hnehin an Champion ta.

Final ah hian Mens Singles khelh hmasak ber niin Mizoram tan Samu-an rawn khelin, Manipur tan Meiraba rawn lutin game hmasa ah an inhnehtawkin chak zawk tur sawi har viau mahse, Meiraba in 21-17 in game hmahruai a la a. Second game chhunzawm niin hetah pawh chungnung zawk sawi tur an awm thei lo, point inthlau lo hle mahse Manipur tan 21-18 in Meiraba a chak leh ta a ni.

Women Singles khelh chhunzawm nghal a ni a, Lalrinzuali chu Mizoram tan rawn pen chhuakin Manipur tan Maheshwari Dev a rawn lut ve bawk. Game tan a ni a, chungnung zawk awm lo mahse Dev in hma a hruai char char a, game hnung lamah erawh Dev in game a thunun chunzawm a, game hmahruai chu 21-12 in a la a ni. Game khelh chhunzawm leh niin Dev in game thunun chhunzawm zelin 21-12 a game la chhunzawmin Manipur in 2-0 in hma an hruai a ni.

Mens Doubles ah Muanawma leh Lalmama rawn lut lehin Manipur tan KH Manjit leh K Dingku te an rawn lut bawk a. Game tan a nih atangin Manipur lamin hma an hruai a, chungnung zawk erawh an awm lo, game tawp lamah Mizoram. lamin rawn lehthal in 21-19 in Mizoram in game an la. Game khelh chhunzawm leh niin Mizoram in hma an la hruai zel, hma hruai nasa viau lo mahse an hmahruaina vawng him tlatin 21-16 a game la lehin Mizoram tan chakna an rawn nei ve a ni.

Womens Doubles ah Zuali leh Hriatpuii rawn lut lehin, Manipur tan Devi leh Purnima an rawn lut bawk. Game hmalamah Mizoram in hma hruai mahse game hnung lamah Manipur rawn che tha chho in 21-16 in game an rawn la a, game khelh chhunzawm leh niin Manipur lam an chung nung a, game an thunun bawk a, Mizoram lam erawh game tawp thlenga insiam tha thei lovin Manipur lamin NE Zone Interstate Badminton Championship, 2017-a Senior Mixed Team Champion nihna turin 21-15 a game la in 3-1 in an champion ta a ni.